لماذا لن أصوت لبوشيحة

مبعد ما حكينا على مرشح التجمع الدستوري الديموقراطي و تفصيل الأسباب اللي تخلي المواطن التونسي ما يصوتلوش نهار الأحد، جاء دور مرشح الوحدة الشعبية محمد بوشيحة.

بالنسبة للعباد اللي ما عندهاش فكرة على الحزب هذا، لازم تعرفو أنو حزب تأسس عام 81 مبعد ما تحررت الساحة السياسية في تونس، توجهم السياسي إشتراكي، يعني يطالبو بتدخل الدولة في مجالات كبيرة كيما الشغل و التشغيل، يطالبو بتأميم أو إعادة شراء الشركات الكبرى اللي تم التفريط فيها كيما إتصالات تونس و معامل الإسمنت. عندهم برنامج جبائي صارم من أجل إعادة توزيع الثروة بصفة أكثر عدالة. كأي حزب يساري يحترم نفسو، عندهم مطالب جريئة و تستحق الذكر، مثل المطالبة بإلغاء الإعدام، المساواة التامة في الميراث بين الرجل و المرأة و شد عندك: يحبو يحلو اليوتيوب و الدايلي موشن (نتصور أنو على هذا بركة شطر الشباب يصوتلهم، برة قالو برلمان شباب). المهم، عندهم تصور عقلاني و علماني للمجتمع التونسي، ضد الأحزاب الدينية و يطالبو بتغيرات جريئة على مستوى القانون الإنتخابي التشريعي و البلدي من أجل إعطاء مجال أكبر للمعارضة في تونس. من النقاط المحترمة زادة عندهم هي الثقافة و التعليم و هذا مش غريب على اليسار التونسي. يقول القايل : ملا برنامج، باش يحلو الأنترنات و الديبي باش يطلع، الشهريات باش تقوى و باش يقضيو على البطالة، لكن ديويو، شخصيا نرفض الديماغوجية السمجة هذي و ذلك لأسباب عدة: * النظرة الدونية اللي يحملها الحزب لنفسو، حزب عمرو 28 عام و شارك في عدد كبير من الإتخابات ما عندوش الحق باش يعتبر نفسو مش أهل لتحمل مسؤولية بلاد كاملة، علاش مترشح مالا؟

* إحتقارو للشعب التونسي بقولو أننا مازلنا ما بلغناش مستوى التداول على السلطة و أنو مترشح فقط للتعبير عن رأيو السياسي المخالف، ياخي ما عندناش حرية تعبير في تونس باش تستنى الإنتخابات باش تحكي؟

* غياب طرق التمويل لبرنامج إنتخابي كبير برشة، أي إصلاحات جوهرية يمكن تبدل حاجة في البلاد لازمها برشة فلوس، و شخصيا إذا نستثني الإصلاحات الجبائية اللي باش تجيب برشة فلوس، ماشفتش أي حاجة يمكن تمول الإصلاحات هذي.

* البرنامج الإنتخابي ـ رغم محاولة تبرئ الحزب من هذا ـ لا يعدو كونو تعداد لنقائص الحكومة و في أكثر من مرة تحضر "نية" الإصلاح و تغيب الطريقة، فمثلا في تونس ما فماش مشكلة في قانون الصحافة لكن التطبيق و العقليات بعاد برشة عن متطلبات أي دولة فيها حرية تعبير.

* البرنامج الإنتخابي متاع الوحدة يمكن القول أنو متكامل و رغم إختلافي معاه في بعض النقاط، لكن نعترف أنو ما خلاش حاجة ما حكاش فيها. لكن 216 صفحة جاتني برشة، يعني كيف المواطن العادي (مش فاضي شغل كيفي) يحل الكتاب متاعهم أكيد باش يحس بالخوف و الإحباط باش يهرب منو، لذا أنا نتسائل عن سبب الإختيار هذا و نتصورو غير إعتباطي فالمطلوب من المعارضة الكرتونية أو القريبة من الحكومة هو إبراز نقائص الحكومة للعباد اللي عندها علم مسبق بهذا، بعبارة أخرى، البرنامج ماهواش موجه لعامة الشعب و مش باش يغير حاجة كبيرة في العقليات.

لهذه الأسباب و غيرها، أدعوكم لعدم التصويت للقائمة الذهبية، مانيش باش نطلب كيما عملت مع التجمع أنو الأنصار متاع بوشيحة يدافعو عن مترشحهم، خاطر ما شفت حتى واحد منهم لا على أرض الواقع لا على الأنترنت