رمضان جاء يا مرحبا!

هاهو سيدك رمضان جاء و مرحبا بيه، قالك شهر دين و تقوى و عبادة و هات من هاك اللاوي، أما أنا شخصيا عندي بعض المطالب الملحة للإخوان اللي يصيموا في رمضان أو يوريو في صيامهم :

ـ حكّوا كشُخكُم راكم عورتوا، الصيام ينتّن الكشخة، حتى ربكم قالها، معناها إذا كنت تحك سنّيك 3 مرات في النهار لازم تولي تحكّهم 6 مرّات توة، و إذا كنت كيما 90 % من التوانسة ما تسمع بفرشة الأسنان كان في الأعياد و العطل، تعمل مزية سكّر فمّك و ما تحكيش معايا، راني فديت كل نهار يصبح عليا واحد عينيا تضبب و نقشعر بكلي، زادة ها الحجة مالحيط و اللي تقول اللي بخرة صائم أطيب من ريح المسك، نذكركم أنو صاحب المقولة هذي هو رب الرمال لذا أنا مش معني بيها و نعتبر البخرة بخرة مهما كانت الظروف و الأسباب.

ـ حلّو عينيكم في الكياس، راهو موش خاطر طايحلكم السكر معناها تقصو علينا و تدخلو فينا و ما تحترموش قواعد الطريق و قيّد على سيدك رمضان، ماعندناش تأمين خاص برمضان ولا ميكانيسيان يصلح بلاش في رمضان.

ـ الخبز : راهو كي تبداو اتدزو في لعباد لربعة متاع لعشية باش تشريو الخبز و المغرب مع الستة ما ينجم يكون كان هبال، الخبز باش يبرد وقتها. حاجة أخرى، ما تشروش خبز ضاربو الهواء و الشمس نهار كامل، راهو مش باهيلكم.

ـ الخدمة و الإنتاجية، مانيش باش نحكي خاتر سينون باش نبدى نبكي و نغرّد

ـ الصلاة و الصيام : راهو كل واحد حر في حياتو : ما نصومش ولا ما نصليش حاجة تخصني وحدي، أنزعونا تعملو مزية.


أيا رمضانكم مبروك