نفخات رمضانية 3

اليوم الجزء الثالث و نتصور الأخير متاع النفخات الرمضانية، نتمنى أني ما نفختهملكمش برشة، ممكن زادة تطلعلي الهبة بنت الهبة (الحقيقية مش متاع سي عباس) و نتحفكم بجزء رابع، أما مانوعدكم بشيء، باش ما
تقولوش مبعد لم ينجز الحر ما وعد.

الجزء هذا بالطبيعة باش يحكي على أهم حاجة أو لنقل، سبب رمضان الأول ألا و هو الدين، مانيش باش نحل مزدوج فقهي على رمضان، أما باش نحاول نحكي على التصرفات الدينية متاع التونسة في الشهر الفضيل هذا.

* التونسي يصيم و يحب الناس الكل تصيم، خاصة الصغار، يحبو يدبسوهم من صغرهم
* التونسي كي يصيم كاينو جاب الصيد من وذنو، و اللي ما يصيمش يولي كخة و ما يجي شي
* التونسي اللي كان يفطر العام اللي فات و السنة صايم يولي يعطي في النصائح و المواعظ للناس الكل، حتى الصايمين منهم
* التونسي ما يحبش لعباد اللي تفطر مجبوره، مرضى السكر و الدم في تونس أكثر من مليون، لازمهم ما ياكلوش قدامهم حتى كان يموتو
* التونسي يفطر و يحشم باش يقول، رغم إقتناعو الشخصي بالقضية
* التونسي يبدى بالوعة متاع كحول أما في رمضان يبطل
* التونسي يفطر رمضان أما ما يشربش كحول
* التونسي ما يحبش شكون يشرب في رمضان، عيب كبير، تقولش عليه عيب صغير خارج أيام الصيام
* التونسي ما يقلقوش أنو يصلي صلاة المغرب برك نهار كامل
* التونسي ما يقلقوش زاده أنو يصلي كان التراويح
* التونسي في رمضان لازمو يقنع العباد باش تجي تصلي معاه التراويح، ممكن خاتر يفد وحدو
* التونسي اللي يولي يصلي في رمضان لازمو يعلن على الملأ صلاتو
* التونسي يتفكر القرآن كان في رمضان
* قراءة القرآن لازمها تكون جهرا و يا حبذا في البلكون ولا الفيراندا باش الجيران تشلق بيه
* التونسي عمرو ما يبطل التكحيل على البنات، حتى في رمضان، الفارق الوحيد اللي هو قبال كان يقول "يا عسل، يا سكر، يا دراجي"، أما توة يولي يقول أستغفر الله العظيم، اللهم إني صائم، و لاحظو معايا أنو في الحالتين ما عندو حتى تأثير على الطفلة كان تدريع الخواطر
* التونسية تبطل اللبسة المثيرة (إذا كان مازال فمة بنات تلبس هكة، على خاطر نتصورهم وفاو مل البلاد) و تولي تلبس دبش محتشم، أما ما يندل شي على خاتر التونسي ديما طالب القرب كي تبداش الطفلة لابسة شكارة
* التنشية زادة تنقص مالماكياج، أما عندها غلطة كبيرة هي أنها تنحي في نفس الوقت الديودوران (مزيل الرائحة) و معجون الأسنان، و هي في ذلك سيان مع الرجل، على خاطر أفتو أنهم يفطرو
* التونسي يولي يموت على الفتاوي في رمضان، ما تبلعش ريقك، ما تتجرحش، ما تحرقش ستوب و هات من هاك اللاوي من الخزعبلات
* التونسي ما يتفكر صلة الرحم كان في رمضان، عام 12 شهر ما يسئلش على بوه و أمو و ما يطلبهم كان في البداية و النهاية متاع رمضان
* التونسي يسمع السديسي ليلة سبعة و عشرين و ينوض يبكي و يغرد، ماو يا كازي علاش تعمل في العمايل المنحسة عام كامل و تخرج تأنيب الضمير كان وقتها؟
* التونسي يشري حوايج جديدة في العيد، يشري الحلو و المشروبات الغازية و يطلب الناس الكل يهنيهم، شكون فيكم شفتوه يفرح بحاجة تحفونة وقت اللي توفا؟