Libre-penseur, rationaliste et humaniste, je me définis comme un optimiste
qui a une grande foi en l'Homme et ses capacités à faire du bien, mais ne néglige pas
les dangers que peuvent générer tous les obscurantistes du monde entier...

samedi 9 janvier 2010

محجوب و نوفل و الخليقة

كان يا مكان في قديم الزمان في بلد بعيد غريب حومة عربي، الحومة العربي هذي في البلاد العربي و كان فيها أضناف متعددة من العباد، على كل لون يا كريمة، القاري و المتثقف و الجاهل و الموش متربي حاشاكم، كانو عايشين في أمان الله، خدمة، قراية تفرهيد، شوية غصرات أما مستورة و الحمد لله كيما كان يقول شيخ الحومة، أيا برة يا زمان و تعالى يا زمان الشيخ مرض و مات، الناس الكل تحسرت عليه أما في قلوبهم كانو ساعات يقولو : تي ملا راحة، راهو كان يتدخل في كل شي و يحب يفرض علينا كيفاش نعيشو. المهم، الحومة العربي في البلاد العربي عدات سنين منغير مشاكل، الناس الكل لاباس عليهم ما عندهم حتى مشكلة، نهار مالنهارات، فاقو الصباح على الحس متاع واحد يسب و يقشقش و يكفر، خرجو من ديارهم ساقيهم أعلى من روسهم يلقاو واحد باندي مشلط زندو أكبر من ترّاس، لابس سروال دجين مقطع و صباط ميليتار و تريكو خلعة (دو كور) مبقّع بالدم و شاد فيدو شطرب يدور فيه في الهواء. كبار الحومة مشاو يجريو باش يحكيو معاه : يا ولدي في طولك، يا ولدي في عرضك، أخطانا مالمشاكل أش عملنالك، ألعن الشيطان و هو شي، ما حبش يفهم و قاللهم هذي أرضي الجديدة ما ينجم يخرجني منها حتى حد. في الوقت هذاكا و البلاد هذيكا صحيح كان فمة الأمن و الأمان لكن في نفس الوقت كان عندهم نظام الحكم الذاتي في إطار التنمية المستدامة (نظرة إيكولوجية للبلاد)، ولذا البوليس ما كانش موجود و الخليفة ما يجي يعمل زيارة عمل كان مرة في الفال. المهم، الخليقة هذا عملها دار مقام في الحومة العربي، خلع دار واحد عمالنا بالخارج و سكن فيها و ولى يشري من حانوت الحومة بالكريدي و عمرو ما يخلصو. فتّكم بالحديث عاد، في نفس العام اللي جاء فيه الخليقة متاعنا، تولد طفل إسمو محجوب، بوه إسمو عمار يخدم سائق سيارة نقل ريفي و أمو إسمها حدة تخدم حارزة في حمام، من نهار اللي تولد فيه و بوه يخبط فيه بالطرايح خاتر كان وين يشوفو يتفكر الخليقة متاعنا و أش عامل فيهم في الحومة، خاتر السيد عمل نظام جديد في الحومة و فرض على العباد الكل إتاوة على الدخول و الخروج مالحومة و صاحبنا عمار صار فيه في جرة التبوريب هذا. المهم صاحبنا محجوب كبر في بيئة حاشاكم ناتنة و في جو متاع قمع و ضرب شبه يومي، وصل عمرو أربع سنين قرر بوه باش يدخلو للروضة خاطرو كان ذكي و كان عندو أمل باش يجيب منو ربي حاجة في القراية، في نفس الوقت، باربو الحومة حس بالمسؤليات كبرت عليه ياخي كمل جاب مرت خوه و أولادها (خوه مات في حادث في الخليج) باش يعاونوه على الحومة، المرا حلت سونا (حمام سوري) و أولادها شدو الشارع كان الطفل الصغير نوفل دخل للروضة و جاء يقرى في نفس القسم (الفراشات) هو و محجوب، كيما قلنا سابقا، محجوب معقد من حاجة إسمها باربو الحومة و زيد كمل جاء ولد خوه يقرى معاه، الطفل دخل في حيط، و نوفل هذا كان مقعار كبير و لسانو موذي، كان ديما يعاير فيه خاطر أمو حارزة متاع حمام و هو أمو عندها سونا و عفس بالبخار. محجوب صاحبنا فد و ملّ و كلّ، كان عندو صحابو يشكيلهم، في السر كان مركحين المشطة في الخليقة هذا أما وقت اللي يقوللهم هيا نعطو طريحة لونفل يقولو: أخطانا مالبلاوات، و كان فيهم حتى جماعة عاملين قصة شعر ميليتار كيما الباربو متاع الحومة باش "يخطاو شرو" كيما كانو يقولو و ما يقلقهم حد في الشارع. المهم محجوب كان من صدمة لصدمة و من تخاذل لتخاذل، ياخي قرر باش يشمر على ذراعو و يحاول يغلب نوفل هذا، أول حاجة عملها مشى يتعلم في الكاراتي، أمانوفل كان خبيث عليه، مشى حكى مع عمو و أقنعو باش يخبط المعلم متاع الكاراتي بحجة أنو موش قاعد يخلص في الإتاوة، و رغم أنو العباد الكل فاهمين علاش المعلم كلا طريحة لكن التفسير الرسمي (خاطر الخليقة كان عندو برّاح يدور كيف بوطبيلة باش يعلمهم بالقرارات) كان يحكي على تهرب جبائي و محجوب تصدم وقت اللي أصحابو متاع الروضة كان فيهم شق يساند في طريحة المعلم لأسباب شخصية. محجوب كمل الصراع متاعو و بدى يتعلم في التايكواندو بالمراسلة، بالشوية بالشوية كبر و تعلم فنون القتال الكل، وكان ديما يتهدد على نوفل و يحب يغلبو، أما نوفل كان أردل منو و كان قاتلو بالعرق و ديما يعاير فيه بالإنجازات الميدانية متاع عمو. أيا نهار مالنهارات و هو يقرى في كتاب "أتعلم الجيدو ـ كونغفو في 80 يوما بدون معلم" يلقى في باب "التراكم البدائي للعضلات" أنو من المعمول بيه أنو الخليقة متاع الحومة لازمو مرة في الستة شهور ينحي الشطرب متاعو و يهبط عركة راس لأي واحد يحب ينافسو، محجوب طار بالفرحة و مشى يجري لنوفل و عطاه نسخة مالقانون، ضحك نوفل لين تقطع عليه النفس و قالو : ياخي ما فيبالكش اللي فمة عركة يعملها عمي كل ستة شهور؟" ـ "لا ما فيباليش، أش بيه البراح ما يحكيش عليها العركة هذي؟" ـ "أمورو هذيكا، البراح مستقل و زادة ديما يحكي على النتيجة متاع العركة" ـ "و ين يعملو فيها العركة هذي، نحب نشوفها" قال محجوب و هو قريب يتطرشق بالبكاء ـ "و راء الخربة في الظلام، الحضور بالإستدعاء و الحكم أمي". محجوب لمّ الشجاعة اللي عندو قالو : "أنا ما يهمنيش فيهم، إذا نغلبك و نعطيك طريحة تقول لعمك يلم دبشو و يمشي علينا و يخلص الكريدي في حانوت خالي". قالو متفاهمين، العركة نهار 1 جويلية تحت ظلف الهندي في راس النهج.
جاء اليوم المشهود، محجوب حضر روحو كيما يلزم أما نوفل دخل رابح الماتش، اللي كانو موجودين نهارتها قالو اللي العركة بقات أكثر من 3 أيام، التشويق و الإثارة كانو أقوى من عركة أخيل و هكتور متاع طروادة، و رغم ممارسة محجوب للجمباز فإنو نوفل تصدالو برشة مرات بسبب مهاراتو كربّاع متميز لكن الغلبة كانت و الحمد لله لمحجوب اللي متربى على القمح و زيت الزيتونة موش الكرواسان و البيفيدوس المنعش كيما نوفل  
وقت اللي ربح، نوفل كان يتصور أنو باش يحرر حومتو، لكن هيهات، حتى المتفائلين قالو أنو في أقصى الحالات باش يحرر الروضة و تبقى الحومة تحت سيطرة الخليقة، أما المتشائمين و إلي باش يعطيهم التاريخ الحق فإنهم توقعو التالي وهو اللي صار مبعد نهارين مالعركة: الخليقة تغشش كيفاش ولد خوه ياكل طريحة حتى لو كانت في الروضة، شد محجوب و حطو في خربة و بنى عليه بالكنتول، فرض على عمار باش يخدم على كات كات باشي يوصل بيها العباد اللي يختارهم هو للروضة

3 commentaires:

  1. Naoufel ne signifie pas "knanou"...

    c'est un nom arabe pur qui existe avant l'islam et qui signifie le généreux, la mer ou "al sayed"

    waraqua ibn naoufel était un chrétien arabe et ce lui qui a annoncé la venu du prophète mohamed

    RépondreSupprimer

قبل ما تعلق على التدوينة تعمل مزية ترحّم على روح الشهداء و أشكر الثورة المباركة اللي خلاتك تنجم تكتب أش تحب منغير ما تبدى تتلفت وراك شكون قاعد يقرالك، تذكر زادة اللي كان أنا نسكت و إنت تسكت البلاد تعاود تدخل في حيط، لذا عبّر أختي/خويا بكل حرية و بكل مسؤولية