عمربانجو باش يبلع سبركة عن قريب

عمر بانجو بالنسبة للعباد اللي ما تعرفوش هو رئيس جمهورية الغابون الديموقراطية الشقيقة، السيّد هذا يحكم ليه قرابة 40 سنا، بالضبط من 1967 و هو زادة ثاني رئيس للغابون منذ الإستقلال. معروف بحُبّو للديموقراطية و التداول على الحكم، يكره السرقة و ما يصرفش أموال الشعب و عمرو ما حط واحد من أقاربو في منصب عالي في الدولة (الدفاع مثلا). معرّس مرتين زادة...


يا سيدي عمك عمر هذا مريض في حالة الموت لدرجة أنهم هزوه يداوي في إسبانيا، و قالك زادة اللي الشعب الغابوني قاعد يستنى بالدقيقة و الدّرج في أخبار رئيسو المحبوب أبقاه الله ذخرا للبلاد و العباد و حرسه من كل مكروه. العباد غادي تالمون ربّاو عليه الكبدة مدة أربعين سنة، متأكد اللي فما برشة عباد باش تموت بالحسرة على رئيسها المفدى...


خلاصة القول شنية؟ :
* العشرين عام الأولة ميزيرية و الثانية يتعوّدو...
* ماعادش يبطاو في كينيا زادة ...
* أعمل كيف جارك ولّا حوّل باب دارك...
* كلّنا في الهوى سوى...
* الشنقة مع الجماعة خلاعة...

و ديما يمشي :)