Le crash du AF 447 : Emprisonnez les tous, dieu reconnaîtra les siens!

كيما سمعتو الناس الكل فمة طيارة متاع آر فرانس طاحت في الثنية بين فرنسا و البرازيل، و نتصور أنكم زادة سمعتو اللي فمة عايلة تونسية كاملة توفات في هالحادث الأليم، بمنسابة هالكارثة نتمنى اللي يكون فمة عباد في تونس عندهم الإمكانيات و الوقت إلخ من أجل رفع دعوة ضد آر فرانس، ضد مطارات البرازيل و ضد الزبراط باش يدخلوهم الكل الحبس، أش بينا أحنا ياخي دمنا ماء و دم الطلاين دم؟ جيبولنا ال ر م ع متاع آر فرانس يعدي أيمات ما تتنساش في بوشوشة، نحطو عايلة القبطان في ڨلبو في السجن المدني بالهوارب و باش نسامحو البرازيل يبعثولنا عينات مالبنات اللي تشطح عندهم في الكرنفال التحفون.
زادة كان فمة إمكانية زيدو رتحونا من ساركوزي و پاولو كوهيلو راهم حتى همّ غلبو عليَّ.

إسلاموفوبيا : التشحتيف المادي نموذجا

فمة قارئ كريم للمدونة المتواضعة هذي أتحفني بالوصلة التالية


في ظل غياب الرادع قطعان الزنادقة يواصلون استهتارهم بعقائد التونسيين


لاحظت و بلا فخر أنو المدونة متاعي مذكوتة ثلاثة مرات، شي يفرهد الحق، المقال يحكي على القطعان الضالة و يبحث عن طرق غلق أفواهها، و يأكد أنو المدونين هذومة قاعدين يتلقاو في الدعم المادي من أطراف خارجية، ما نكذبش عليكم أنّي مانيش ضد التدوين بمقابل (هاهو القزوردي يعمل فيها، أشن ناقصني ءنا؟) و ما نحتقرش العباد اللي تربح فلوس مالكتيبة و مثلي الأعلى لهنا هو ميشال أونفري اللي يكتب في الشهر كتب فلسفة أكثر مني أنا في المدونة متاعي.

زيد على ذلك الأزمة المالية لعالمية و الوضعية المادية المزرية اللي تمر بها شعوب العالم الثالث، الواحد لازمو يفيق على وضعو و ياخو بايو ماللول حتى كان جاء ضرب عصا كيما يقولو.

لذا نتوجه لأصحاب القلوب الرحيمة و المتواطئة مع اللوبي البنغالي من أجل تحرير راس لمبوط و الأخوة بين الشعوب، نتوجهلها بنداء عاجل باش يمشيولي بعض حاجة كل مرة "نهاجم" فيها الإسلام، هو الحق كنت نتصور اللي مهاجمة فكرة مش كيما مهاجمة شخص أما يظهر لا، بصفتي مواطن بالخارج نقبل المنح بالدولار و اليورو و حتا بالدينار التونسي فماش ما نعمل دويرة و نلم سويقاتي.
زادة نطلب من جماعة البوكشطة اللي عندهم برشة فلوس باش يمشيو تفتوفة كل مرة نهاجم فيها المسيحيين و اليهود، ماهم ما يطيقولهمش ريحة، مستعد زادة نكتب مدونات بالفرنسية بالنسبة للعباد اللي ما تفهمش لغة الضاد.
نذكر زادة (رغم أنو مش هذا هو الموضوع متاعنا) اللي بصفتي معادي اللإمبريالية و ضد الحرب، إذن أنا بالطبيعة ضد أمريكا و ضد إسرائيل، كان تحبو ساعة ساعة تدوينة ما يقلقنيش، المهم السكة كيما يقولو ناس قبل.
ههههه

و شكرا على الدعم المادي للمدونة

عاجل : عمر بانجو بلع سبادري

بلغنا للتوّ إنتقال السيد عمر بانجو إلى جوار الرفيق الأعلى بعد أربعين سنة من العمل و التفاني من أجل خدمة الوطن الغابوني، أربعة عقود من الديمقراطية و الحرية و التفاني و التعددية و التداول على الحكم. الخبر هذا موجود على موقع جريدة لوبوان الفرنسية.

السؤال اللي يطرح نفسو : شكون باش يشد في بلاصتو؟

* مرتو
* ولدو
* نسيبو


بإمكانكم التصويت عبر التعليقات على ها التدوينة :)

طابور خامس و تفاهمنا، أما وينهم بقية الطوابير؟

الدنيا قامت و لم تقعد على الطابور الخامس و من لفّ لفّهم من المدونين التوانسة و على رأسهم المدعو عاشور الناجي، في قلب الدفاع فمة عياش مالمرسى و الزبراط يلعب تسعة و نصّ، قالّك "الشرذمة" هذي (تعجبني هالكلمة) تمثّل ا لطابور الخامس في تونس. قلت مادام الحكاية هكة، نمشي نعمل طلة على الويكي نثبت في أصل الكلمة هذي، يا سيدي قالك السبة و ما فيها، عام ككح، جماعة فاشيين في إسبانيا حبوا يهدو على مدريد اللي كانت وقتها تحت سيطرة الجمهوريين، الهجوم كان عن طريق أربعة محاور أو أربعة طوابير و من أجل إثارة البلبلة في صفوف الفريق المنافس و من أجل خلق الشوشرة و الإنشقاقات في الدفاع و في إطار الإصطياد في الماء العكر، راديو فاشية ف م خرجت إشاعة مفادها أنو فمة طابور خامس ديجا موجود على عين المكان (في مدريد بالنسبة للعباد اللي ضاعت)، الهدف من الإشاعة هذي هو إختراق الصفوف عن طريق زرع الشك بين أعضاء الفريق الواحد. هذا هو الإطار التاريخي متاع الطابور الخامس.
هيا توة نعملوا مقارنة بسيطة مع المدونات التونسية:

ـ شكون اللي قال اللي فمة طابور خامس؟
ـ شنوة الهدف من الحديث عن طابور خامس؟
ـ وينهم طوابير الفاشيين اللي قاعدين يهاجموا في البلاد؟
ـ كيفاش ناس تساند التيار الإسلامي تعتبر نفسها جمهورية؟
ـ الإخوة اللي قاعدة "تناضل"، يدافعوا على شنوة؟ شنية المكتسبات اللي خايفيين عليها؟

المهم، أنا شخصيا الناس هذي تفكرني بدون كيخوت و صراعو مع طواحين الهواء، أما هو على الأقل هبل في جرة القصص و الكتب اللي قراها، مش في جرة النايل سات و العرب سات، و هو زادة نفع شوية عباد في رحلتو، مش كيف جماعتنا...

مغرب عربي موحّد؟ علاش لا؟

أول ملاحظة نحب نقولها هي أنو المدونات التونسية ما حكاتش على المغرب العربي الموحد في غرة جوان المجيد كيما العام اللي فات، ممكن لعباد فدت و الأزمة الإقتصادية العالمية مرّت على الأذهان، المهم، كنت نفكر في حكاية توحيد الدول المغاربية و قلت بما أنو الشعوب متاعنا قاعدة تصك في النوم و ما على بالها أش صاير و أش مش صاير، و بما أنو البلاد تباعت شقف و سلعة و أحنا ما على بالنا، قلت علاش ما نصدّروش للأشقاء المغاربين شقيق تماضر، هو ما بقالوش برشة حاجات تتشرى في تونس، يمشي يشوف أفاريات في بقية الدول، يشري النهر الصناعي متاع ليبيا، يولي المدير الرئيس العام متاع المجمع الشريفي للفسفاط، يعطيوه لزمة 99 عام على حوت موريتانيا، لازمو زادة يعمل ضربات بترول باش ما يحسش روحي دوني قدام جماعة الخليج. المهم يتحلّلو اللعب شوية توة تشوفو الرجال اش تعمل، توة يوحدهولكم المغرب العربي كامل و كان لزم توة يكمل ضربات مالسينغال و مصر!



اللهم اغنهم و افقرنا..اللهم زدهم و انقصنا..اللهم سفّرهم و امنحنا فرصة التلويح لهم بالمناديل