الشيطان : بعَوْ باش نجي نعضّك!

عمك الشيطان هذا طلع شرير مش نرمال، قالك تبدى مبنّك في أمان الله في بيتك تقرى مثلا و يبدى واحد في بلاصة عالية يبدى يرغي و يعيط و يستدعي في العباد باش تجي تصلي، تقول إنتي هيا نمشي نعطي حق ربي ياخي يخرجلك هو من تحت السرير ولا مالخزانة و يبدى يزنّ عليك و يقلك سيب عليك راهي بيعة فاشلة. تولي إنتي تبطل و ترصيلك في الإخرة مبنك مع فرعون، بارّي وايت و روجي لومار يعملو بيكم في بابركيو...

زادة الشيطان ينجم يعملك مشكلة مع أمك هكة من غير سبب مش على خاطر إنتي معفط و تحب الكورة أكثر من أمك...

ضحكة 1

إبليس أكيد عامل إتفاقية مع المحامين خاترو يلز العباد باش تطلق و مايحبش شكون يبقى رايض في دارو...


ضحكة 2


الشيطان زادة عندو الأكتاف خاتر كي تبدى قطعة متعدية و لابسة روبة هو اللي ينفخ الريح باش تتهز و يطيح برشة حاجات من إيدين البنات اللي لابسين ديكولتي...

ضحكة 3

نتصور زادة هو اللي عاونني باش نكتب المدونة هذي و بالكشي عندو كونت على التن بلوغ باش يصوتلي على
الأرتيكل متاعي...

ضحكة 4


خلاصة القول : شي يأسف أنو العباد ديما تبقى تلوج على شماعة تعلق عليها أخطائها، الشيطان موجود على المستوى الشخصي و إسرائيل على المستوى العام، شخصيا ما نفهمش كيفاش إنسان ما يكونش مسؤول على التصرفات متاعو، كيفاش يحب يحطها في راس كائن خيالي باش يمنع منها، إذا إنتي معفط لحد أنك تبعث أمك تقضي في جراير ماتش كورة ولا ما تروحش تشوف صغيراتك خاتر طرح البولوت سخون برشة، برجولية السماح، المشكلة أنو العباد ماهمش مقتنعين بأغلاطهم و بالتالي ما يحاولوش يصلحوها. حالة و برة...