يزّي راكم كثّرتو على ما وصّاوكم!

يا ناس راني فدّيت و ملّيت، مانيش عارف لعباد اش بيها وصلت لهالحالة المكربة؟

إنجّم نفهم اللي عباد تكون مغرومة بالكورة، صحيح، تحب جمعيتك و تمشي تشجعها كل نهار أحد في الستاد، علاش لا؟ أما يا خويا تولّي تهتري بيها هاكا مايجيش.
عندنا توة قرابة الشهرين، خاصة ملّي ربح الإفريقي الترجي و رجع الّلعب على البطولة مشوق شوية، من وقتها لعباد الكل دخلت في حيط. تونس تقسمت حسب الإنتماء الرياضي، اما بما أنو التوانسة ما ينجموش يعملو حاجة على قاعدة، قالّك هيا انتنوشوا (ولا نفوحوا كان تحب) لحكاية بشوية جهوية ما فيها باس.
النتيجة كانت واضحة و تعيسة، أولها و ممكن أكثرها تعبيرا هي المشكلة مابين جمهور الترجي متاع العاصمة و جمهورها الجبري في داخل الجمهورية، و بالطبيعة كلات بعضها مابيناتهم على خاطر غناية في الفيراج تسب في جماعة جندوبة. إلأكيد جدا إلي جمهور الترجي اكبر البرة مالعاصمة من داخلها، ما نعرفش علاش إنسان عاقل (حتى كان مغروم بالكورة) ينجم يولي يسب في محبي فريقو خاترهم جاين من بقعة أخرى. إذن عندنا صراع أول بين عاصمة و مش عاصمة، فينو قافز و جبري مقوعر...
إلنقطة الثانية هي كره السواحلية، يا خويا أومورك ما تحبش الإيتوال، أما اش مدخل السواحلية الكل، ياكي شكون ثبتّهم يهنيوا ولا لا؟(ساحلي يا حا**) و زاده اش مجبد امهات الخلق في ستاد متاع كورة. زادة ما كنتش نتصور انو توصل الشمايت ضد ليتوال إلى حد تشجيع الأهلي ضد ممثل تونس، الظاهرة هذي شفناها زادة مع صفاقس و نتمنى إلي ماعادش نشوفوها...
ظاهرة التكسير زادة، يا خويا فاش قام جمعيتك تخسر تقوم تهرسلي فيترينة ولا حانوت معيش بيه صغيراتي؟ ياخي مش فلوس الشعب يبنيوا بيها في ستادات؟ مالا كسرة في هاك اليد الي باش تلمس حاجة ملك الناس الكل.
خلي عاد الأهازيج و الأغاني الي نسمعوها عند الفرق الكل : ڨيرا، حرب، كاميكاز، انتيحاري، نهدّوا إلخ من المصطلحات الدخيلة على ثقافتنا، على الأقل الكروية منها.

لنحوصل : الناس ماعاد عندها شغلة كان الكورة، فقر، ميزيريا، تمرميد، بطالة، قهر، ذل، شلابيق، كفوف، الحاجة الوحيدة الي مزال يحسوا بيها انو عندهم دخل، رأي و تأثير فيها هيا الكورة، زيد معاها شوية "حرية تعبي" داخل الملعب (حتا كان نسبو في بعضنا، اما المهم حرية)، النتيجة واضحة : هستيريا جماعية، غياب تام للعقل، اضطراب الإدراك، حالة رهاب و خوف دائم، الإيمان بنظرية المؤامرة إلخ...

الحاصل، داخلين في حيط لو ماكسيمون!

إنفلونزا الحلّوف، غضب إلاهي بالطبيعة !

أخر طلعة خرجولنا بيها البوكشطة هي أنّو هالأنفلونزا متاع الحلوف الي فاجعة العالم الكل هي ضرب من ضروب الغضب الإلهي ضد الشعوب الكافرة و خاصة الضالين منهم، أكيد عرفتوا أنّي نحكي على المسيحين إلي حرفوا دينهم باش يولّوا ينجموا ياكلوا الجمبون و الّاردون و ما تيسّر من الڤينو (النبيذ تقول انتي). حاصيلو، جماعة البوكشطة (مش المسلمين الكل بالطبيعة) قالولك الّي أحنا، بصيفتنا خير أمة أخرجت للناس، باش نسلكوها و المرض هاذا ماهوش باش يقربلنا.

حاجتين نحب نحكي عليهم :
ـ أول حاجة، الحلوف صحيح حيوان يتربى في المزارع، أما زادة هو كيما الحيونات الكل كان في الأصل حيوان برّي، و الخنزير الوحشي مزّال يعيش في تونس و أمورو جبنية زادة، رغم الّي الدولة مرخصة للفلاحة و الصيادة باش يقتلوه في كل أيام السنة، لكنو مكرهم في عيشتهم و قاعد يضر برشة الفلاحة خاصة في واحات الجنوب، زادة المرض ما ينتقلش بالأكل لكن بالخلطة بيه، يعني ما فمة حتّا علاقة بتطبيق الدين
ـ ثاني حاجة، أش بيه رب المسلمين نسى باش يحكي على أنفلونزا الطيور، ولا زعمة خاطر أسهل باش تحرم حاجة ماهيش في العادات الغذائية متاع العرب في هاكا الوقت من انّك تحرم الصيد الي يعتبر حاجة اساسية عندهم وقتها.

أخيرا، نحب نعرف علاش الضالين ما صارلهم شي؟

المهم، كان هالجموع تولهات بأرواحها و نقصت مالتبربيش على الغرب الكافر خير، حلوا مشاكل شعوبكم و مبعد يعمل دليل في الشعوب الأخرى...

Sidi Boussaïd : Une des meilleures terrasses au monde!

Une superbe nouvelle qui fait vraiment plaisir! Sidi Chebaane est selctionné, faut dire que la vue la bas est tout simplement ENORME!

le lien et l'article

http://www.rue89.com/2009/04/25/avec-vous-le-tour-du-monde-des-plus-belles-terrasses

نكتة اليوم : زغلول النجار و النجم الطارق

ههههههههه

عمري ما كنت نتصور الّي فمّة عباد يجد عليها هالخنّار، أمّاشوفو التعليقات متاع الجموع شنية : شي يعمل العار، قالّك فمة صوت يتعدى في فراغ الفضاء!

العلم منكم براء و العقل منكم براء! يا أمة ضحكت من جهلها الأمم! إلى مزبلة التاريخ يا من كرمتكم الطبيعة بعقل فأهملتموه و أنجرفتم وراء الخرافات و الأراجيز!

بوكشطة صغيرون، يكبر و يولّي مسكّر بلفلورتانش!!!

توة فرخ صغير كيما هكة، مزال ما فاهم مالدنيا شي و مرعوب ديجا و هو يقرى فالقرآن، ما يعرش روحو فاش قاعد يقرا و يبكي، كي يكبر كيفاش تحبّوه يطلع مخو محلول و يتقبل الرأي الأخر و يناقش و يتفهّم، تي كان تعطيه مكحلة و تقلّو أقتل أمك راهم يحكيو عليها في القرآن إيلاما يقتلها عينيه مغمضة!
و شوف شكون عاد فرحان بيه و جايبو من نايروبي : البوكشطة، ماهم يحبّو شكون يطلع سطل كيفهم!!!

الصبر و برّة، خاطر هالجموع دخلت في حيط من هاكا العام!!!